آنحضرت صلی اللہ علیہ وسلم نے سر مبارک پر کبھی خضاب نہیں کیا
راوی:
عن ثابت قال سئل أنس عن خضاب النبي صلى الله عليه وسلم فقال لو شئت أن أعد شمطات كن في رأسه فعلت قال ولم يختضب زاد في رواية وقد اختضب أبو بكر بالحناء والكتم واختضب عمر بالحناء بحتا .
" حضرت ثابت رضی اللہ تعالیٰ عنہ سے روایت ہے کہ حضرت انس بن مالک رضی اللہ تعالیٰ عنہ سے نبی کریم صلی اللہ علیہ وسلم کے خضاب کرنے یا نہ کرنے کے بارے میں پوچھا گیا تو انہوں نے کہا کہ اگر میں آنحضرت صلی اللہ علیہ وسلم کے سر مبارک میں سفید بالوں کی تعد اد شمار کرنا چاہتا تو یقینا کر لیتا (یعنی آپ صلی اللہ علیہ وسلم کے سر مبارک میں چند ہی بال سفید تھے ) اس صورت میں آپ صلی اللہ علیہ وسلم کو خضاب کرنے کی کیا ضرورت تھی چنانچہ آپ صلی اللہ علیہ وسلم نے کبھی خضاب نہیں کیا ۔ ایک روایت میں حضرت انس رضی اللہ تعالیٰ عنہ نے یا حضرت انس رضی اللہ تعالیٰ عنہ سے ثابت رضی اللہ تعالیٰ عنہ نے یہ عبارت مزید نقل کی کہ حضرت ابوبکر رضی اللہ تعالیٰ عنہ نے مہندی اور وسمہ کا خضاب استعمال کیا اور حضرت عمر رضی اللہ تعالیٰ عنہ نے صرف مہندی کا خضاب استعمال کیا ۔" (بخاری ، مسلم )
تشریح
آپ صلی اللہ علیہ وسلم نے کبھی خضاب نہیں کیا ۔ کا مطلب یہ ہے کہ آپ صلی اللہ علیہ وسلم نے سر مبارک میں کبھی خضاب کا استعمال نہیں کیا اس صورت میں یہ روایت پیچھے نقل کی گئی اس روایت کے منافی نہیں ہو گی جس میں ریش مبارک پر خضاب کرنے کا ذکر کیا گیا ہے جیسا کہ آگے بھی حضرت ابن عمر رضی اللہ تعالیٰ عنہ کی روایت آ رہی ہے ۔ نیز مہندی اور وسمہ دونوں کے مخلوط اور صرف مہندی کے خضاب کے سلسلے میں جو بحث کی جاتی ہے وہ بھی پیچھے گزر چکی ہے ۔